Exo 14 | NdeIBE | STEP | UJehova wathi kuMosi,

Exodus 14

1 UJehova wathi kuMosi, 2 “Tshela abako-Israyeli ukuthi babuyele emuva bayomisa ePhihahirothi phakathi kweMigidoli lolwandle. Kabamise eceleni kolwandle malungana leBhali Zefoni. 3 UFaro uzacabanga ukuthi abako-Israyeli bayantula nje elizweni besangene ngoba sebevalwe yinkangala. 4 Njalo ngizayenza ibe lukhuni inhliziyo kaFaro abeselandela exotshana labo. Kodwa ngizazizuzela udumo ngoFaro kanye lempi yakhe yonke, lamaGibhithe azakwazi ukuthi mina nginguJehova.” Ngakho abako-Israyeli bakwenza lokhu.

5 Kwathi inkosi yaseGibhithe isitsheliwe ukuthi abantu basebebalekile, uFaro lezikhulu zakhe baguquka ezingqondweni zabo ngabako-Israyeli bathi, “Sesenzeni manje? Sesiyekele ama-Israyeli ahamba salahlekelwa yikusetshenzelwa yiwo!” 6 UFaro waselungisa inkolo yakhe yamabhiza waphuma lempi yakhe.

7 Wathatha izinkolo ezingamakhulu ayisithupha ezekhethelo zahamba kanye lezinye izinkolo zaseGibhithe ngayinye ilenduna yayo. 8 UJehova wayenza yaba lukhuni inhliziyo kaFaro inkosi yaseGibhithe, ngakho waxotshana lama-Israyeli ayehamba ngesibindi.

9 AmaGibhithe kugoqela wonke amabhiza kaFaro lezinkolo, abagadi bamabhiza lamabutho, abaxhuma abako-Israyeli ababamba nxatshana bemise ngasolwandle eduzane lePhihahirothi malungana leBhali Zefoni.

10 Kwathi uFaro esondela ama-Israyeli athi qaqabu abona nanko amaGibhithe asebanxwanele. Besaba bathuthumela bakhala kuJehova.

11 Bathi kuMosi, “Kambe yikuthi kwakungelamangcwaba yini eGibhithe uze usilethe lapha enkangala ukuba sizofela khona? Manje wenzeni ngokusikhupha eGibhithe?

12 Asitshongo kuwe yini siseGibhithe ukuthi siyekele? Satsho sathi siyekele sikhonze amaGibhithe. Kwakuzaba ngcono kithi ukukhonza amaGibhithe kulokufela enkangala!”

13 UMosi wabaphendula abantu wathi, “Lingesabi. Manini isibindi, lizabona ukuthi uJehova uzalikhulula njani lamuhla. AmaGibhithe eliwabonayo lamuhla kalisoze liphinde liwabone njalo. 14 UJehova uzalilwela; lina manini lithule.”

15 Ngakho uJehova wasesithi kuMosi, “Kanti ukhalelani kimi na? Tshela abako-Israyeli baphume bahambe. 16 Phakamisa intonga yakho welulele isandla sakho phezu kolwandle amanzi adabuke phakathi ukuze aba-Israyeli bahambe phakathi kolwandle emhlabathini owomileyo.

17 Ngizazenza zibe lukhuni izinhliziyo zamaGibhithe ukuze angene abaxhume. Njalo ngizazuza udumo ngoFaro lempi yakhe yonke, langezinkolo zakhe labagadi bakhe bamabhiza.

18 AmaGibhithe azakwazi ukuthi mina yimi uJehova nxa sengizuza udumo ngoFaro, langezinkolo zakhe labagadi bakhe bamabhiza.”

19 Kwathi khonapho ingilosi kaNkulunkulu eyayikade ihamba phambili kwempi ka-Israyeli yasuka yayahamba ngemuva kwabo. Insika yeyezi layo yatshuduka yasuka phambili yayakuma ngemuva kwabo, 20 yehlukanisa impi yamaGibhithe leyama-Israyeli. Ubusuku bonke iyezi laletha ubumnyama kuleli icele (lamaGibhithe), laletha ukukhanya ngakuleliyana icele (lama-Israyeli); ngakho kabakho abasondela kwabanye ubusuku bonke.

21 Ngakho uMosi waseselulela ingalo yakhe phezu kolwandle, kwathi ngalobobusuku uJehova wafuqela ulwandle emuva ngomoya wempumalanga olamandla kwasala umhlabathi owomileyo. Amanzi adabukana phakathi,

22 kwathi aba-Israyeli bazihambela phakathi kolwandle emhlabathini owomileyo amanzi eludonga ngapha langapha kwabo.

23 AmaGibhithe abalandela, amabhiza wonke kaFaro, izinkolo labagadi bamabhiza bonke babalandela phakathi elwandle. 24 Kwathi ngomlindo wokucina wobusuku uJehova wakhangela phansi esensikeni yomlilo leyezi, wakhangela phansi empini yamaGibhithe wayidunga yaswela ukwazi.

25 Wenza ukuthi amavili ezinkolo zawo akhumuke okwenza kwaba nzima ukuthi aqhubeke lula. AmaGibhithe asesithi, “Kasisuke kuma-Israyeli. UJehova uyabalwela ukuba behlule amaGibhithe.”

26 UJehova wasesithi kuMosi, “Phakamisa isandla sakho phezu kolwandle ukuze amanzi abuyele ambokothe amaGibhithe lezinkolo zawo labagadi bamabhiza.” 27 UMosi waseselula isandla sakhe phezu kolwandle, kwathi emadabukakusa amanzi abuyela endaweni yawo. AmaGibhithe ayebaleka eqonda emanzini uJehova wawagubuzela ngamanzi olwandle.

28 Amanzi aqubuka abuyela emuva agubuqela izinqola labagadi bamabhiza, layo yonke impi kaFaro eyalandela aba-Israyeli olwandle. Akusilanga loyedwa kubo. 29 Kodwa abako-Israyeli badabula elwandle emhlabathini owomileyo kulezindonga zamanzi esandleni sokudla lakwesenxele.

30 Ngalolosuku uJehova wasindisa u-Israyeli ezandleni zamaGibhithe, njalo abako-Israyeli bawabona amaGibhithe ethe dandalazi ekhunjini lolwandle esefile. 31 Kwathi ama-Israyeli ebona amandla amakhulu uJehova awatshengisa kumaGibhithe, abantu bamesaba uJehova babeka ithemba labo kuye lakuMosi inceku yakhe.